مأساة آرسنال.. الحب ولوغاريتمات أخرى
الحقيقة أننا من أحسن الفرق اللي بتلعب كرة في أوروبا وبتعمل جُمل فنية، وده بيحصل من غير ما يبقى عندنا فكرة النجم اللي شايل الفرقة وحتى اللاعيبه اللي كانت موجودين في آخر دوري كسبناه في 2004 ماكنوش أحسن لاعيبه موجودين في العالم الوقت ده، ومن بعد آخر نهائي وصلناله في 2006 وإحنا بننهار.
أنا متأكد أن فينجر بيحب آرسنال جدًا، وده سبب كبير في اللي إحنا وصلناله دلوقتي، هو عايز يعمل فريق كبير بلاعيبه سنهم صغير ويفضلوا مستمرين معاه وكل سنة في الميركاتو الصيفي أو الشتوي يجيب لاعيبه محتاجهم في مراكز معينه عنده نقص فيها، بس أغلبية اللي هو بيجيبهم مايصلحوش أنهم يلعبوا في آرسنال.. زي سانوجو وجيبس.
وماينفعش يحصل زي الموسم اللي فات، إني أبقى محتاج مهاجم متميز وأروح أشتري "ويلبيك" وفي نفس الوقت أحتفظ بلاعيبه سنهم كبير ولياقتهم منتهية زي "فلاميني" و"ارتيتا" و"روزسكي" " ميرتساكر".
غير كده الإصابات اللي على طول في الفريق ومفيش في نفس الوقت البديل المميز اللي يقدر يظهر بمستوى كويس، إحنا اشترينا تشامبرز ويبوشي وهما مركزهم باك رايت وبنستخدم الأول لما يبقى عندنا مشكلة في قلب الدفاع! من ساعة ما مشي فان بيرسي اللي كان بيلعب بتراخي جدًا في آخر أيامه مع الفريق، معرفناش نجيب مهاجم كويس عليه القيمة والسبب غير معروف والسنة دي مفيش صفقة محترمة أو لاعب حد يعرفه جبناه غير اللاعيبه اللي فينجر كان بيتابعهم وعجبوه ومعتقدش أن أي واحد فيهم هيبقى كويس حتى.
أوزيل وسانشيز وتشيك آخر 3 صفقات يتقال عليهم مميزين إحنا جبناهم والباقي نوعًا ما مقبولين حتى النني هو مش لاعب الوسط المميز في العالم يعني، ولسبب غير مفهموم محدش يعرف أيه مشكلة فينجر في إنه يصرف في موسم ويجيب كذا لاعب مميز لفريق على طول بيصعد لبطولة أوروبا ومحتكر المركز الرابع في الدوري اللي أمنية حياة أي مشجع انه يكسبه بعد 12 سنة .
لاعيبه آرسنال ممكن نقول من 2010 عندهم مشكلة غير معروفة ممكن تلاقيهم بيلعبوا بشكل عظيم في ماتش ونفس التشكيلة في ماتش تاني تلعب بطريقة مستفزة وبتراخي رهيب قدام فريق ضعيف جدًا زي واتفورد الموسم اللي فات، وبسبب ده كل ماتش بنبقى حاطين إيدينا على قلبنا وكأنه ماتش نهائي لأننا مش عارفين الحالة المزاجية أو خطة المدرب هتبقى إيه اليوم ده. بعد ما النني راح آرسنال، كل المصريين بقوا بيشجعوا الفريق حتى اللي مالهمش في الكورة وبيبقوا مستنيين منه يجيب أجوان، مش عارف إزاي، وبيعلقوا على طريقة لعب آرسنال وهما مش فاهمين حاجة.
مش معقول نبقى مش عارفين نفوز على تشيلسي من ساعة ما مورينو مسكهم، وحتى وهم في أضعف حالاتهم زي السنة اللي فاتت ومش معقول أن ماتش توتنهام أبقى بدور فيه على التعادل.. ومش معقول أن كل ماتش ليا في بداية الدوري اتغلبه.